Retorn a la patz. Entreten amb Brian Weiss.
Revista Athanor. Numèro 35. Setembre-octobre de 2002. Paginas 15-18.
Retorn a la patz. Entreten amb Brian Weiss.
Entrevistaire: Josep Agustín. Interprèt: Loto Perrella. Fotograf: Natalia Campoy.
Lo Doctor Brian Weiss. Fòto : Natalia Campoy.
Cossí èsser en patz amb se meteis e, en consequéncia, amb tota la rèsta es benlèu la formula magica la mai recercada per l’èsser uman dempuèi totjorn. Quand foguèrem recebuts pel Doctor Brian Weiss a l’ostalariá, e pendent tot l’entreten, foguèrem acompanhats per la tranquillitat, la bona umor e lo caractèr atentiu d’aquela persona.
La conversacion s’orientèt a l’entorn de son trabalh dins lo domeni de las regressions e d’autres aspèctes, d’unes fenomenologics, de l’actualitat.
Dins sas paraulas, avèm ausit una afirmacion drechurièra: «L’Amor e la Compassion son dos ingredients essencials per arribar a dissòlvre la paur…». Una bona formula, en efièch, per èsser en Patz.
–Doctor Weiss, vòstre trabalh dins lo domeni de las regressions es plan reconegut al nivèl internacional. Sètz un mètge prestigiós dins lo domeni de la psiquiatria biologica. Vos formèretz a la medecina convencionala. La vida après la mòrt, los mots arma, esperit, energia, mèstres, fasián pas partida alavetz de vòstre vocabulari professional. Quin foguèt lo catalisador que vos conduguèt a començar las regressions?
–Çò que disètz es plan exacte. Ai pas res aprés de tot aquò a l’escòla de psiquiatria, mas l’experiéncia amb Katherin, dont es question dins Muchas vidas, muchos maestros (Mantuna vida, mantun mèstre), foguèt la debuta del cambiament. E, dempuèi 1988, ai realizat de regressions amb mai de 3.000 pacients: mai o mens 3 500 en terapia individuala dins mon gabinet; mas, se se ten compte los tractats en grop, n’i a agut fòrça mai. En sciéncia, l’un dels principis fondamentals consistís a observar sens jutjar; s’obsèrva sens esperar de resultats. Quand se fan d’observacions, s’establisson d’ipotèsis e aital las teorias scientificas se desvolopan. Del temps que fasiái aquelas observacions amb Katherin, observavi en çò de d’autres pacients de fenomèns que caliá estudiar e que se podián pas ignorar. D’unas personas, pendent la regression, parlavan dins de lengas estrangièras qu’avián pas jamai apresas; d’autras coneissián de donadas e d’informacions sus elas meteissas provenent d’autras epòcas e d’autres luòcs, aital coma de detalhs istorics qu’avián pas jamai estudiats; d’unas trobavan quitament d’informacions sus lors pròprias tombas dins los ancians registres de lors vilas. E, a l’encòp, lor estat de santat se melhorava: los simptòmas desapareissián, las paurs s’esfaçavan. Observavi donc de cambiaments impressionants en çò de mos pacients a totes los nivèls. Coma scientific, deviái estudiar aquelas causas e elaborar d’ipotèsis. Es aital que mon actitud a cambiat. Uèi, formi cada annada de centenas de terapeutas per tal de perseguir aquel trabalh, e obtenon los meteisses resultats que los qu’ai ieu observats.
–Qué a significat lo rencontre amb Katherin dins vòstra vida professionala, familiala e sociala?
–Aquò provoquèt de plan grands cambiaments dins los dos domenis de ma vida, professional e personal. Al trabalh comencèron de parlar d’ieu e a s’interessar a mon trabalh dins lo mond entièr, e dels pacients arribèron de totas las regions del mond a mon gabinet per recebre aquel tipe de terapia. Dins ma vida personala tanben, las valors cambièron en seguida d’aquel trabalh. Descobriguèri que la mòrt existissiá pas e que, en consequéncia, caliá pas de n’aver paur. E qu’emportam pas nòstres bens amb nosautres quand nos morissèm. Mas valors cambièron, las relacions umanas personalas venguèron mai importantas, desvolopèri un sentiment de patz e de tranquillitat e aprenguèri a meditar. Aquelas causas cambièron ma vida.
D’esquèrra a drecha: l’interprèta Loto Perrella, lo Doctor Brian Weiss e l’entrevistaire Josep Agustín. Fòto: Natalia Campoy.
–Avètz escrich mantun libre sus aquel subjècte, demest los quals Muchas vidas, muchos maestros (Mantuna vida, mantun mèstre) e Lazos de amor (Ligams d’amor). De centenas de personas an beneficiat de vòstre trabalh e se son formadas amb vos. En qué consistís una regression?
–Consistís a remontar dins lo temps, dins un estat de concentracion e de relaxacion prigondas, per tal de se rebrembar d’eveniments e d’experiéncias del passat. Se pòt agir de davant-ièr –aquò tanben es una regression–, de l’enfança, del periòde prenatal, de vidas passadas o encara d’experiéncias espiritualas. Ièr, i aguèt una conferéncia importanta a l’ostalariá Mayestic; i aviá mai o mens quatre centas personas. Faguèrem un exercici de grop e mai de la mitat dels participants evoquèron de vidas passadas. Las regressions son pas dificilas de realizar e son seguras. Foguèt un talhièr de cinc oras e las gents visquèron d’experiéncias extraordinàrias; puèi las comentèron entre eles.
–Dins vòstre libre Muchas vidas, muchos maestros, Katherin, vòstra pacienta, dintra en contacte amb sos mèstres dins un estat d’ipnòsi indusida. Es possible de viure aquela experiéncia de faiçon volontària?
–Òc, fòrça gents o fan. Pendent lo talhièr d’ièr, mantuna persona en estat d’ipnòsi e de regression prigonda visquèron d’experiéncias. Avèm totes d’actituds mediumnicas. Podèm totes recebre de messatges, de còps de nòstres pròches defuntats, de nivèls mai nauts, de mèstres, perque sèm totes religats. Es una sola energia e una sola consciéncia. Amb d’entrainament, nos podèm connectar a aquela energia superiora e a aquela consciéncia superiora. Çò que katherin faguèt a aquel moment me pareguèt extraordinari, mas fòrça gents o pòdon far.
–Dempuèi las annadas 40 o 50, l’umanitat a conegut de cambiaments scientifics e culturals de totas menas, plan rapidas. Uèi, a l’èra d’Internet, tota l’informacion, bona o marrida, es a nòstra man. Medecina alternativa, ecologia, espiritualitat, son de mots que fan partida del vocabulari de quasi totòm. Qué pòt significar per l’èsser uman d’èsser conscient d’aquelas realitats dont nos parlatz?
–L’aspècte positiu de tot aquò, es que se pòt partejar d’informacions e de coneissenças plan lèu. Mas i a tanben d’aspèctes negatius: aquò nos daissa pas lo temps d’aprigondir, de meditar, perque sèm de contunh bombardats per de factors extèrns. Pensi pas qu’aquò siá ni bon ni marrit: es una autra tecnologia, coma los telefonets qu’interferisson de contunh dins nòstra vida, mas que pòdon de còps èsser utils. Tot deu èsser utilizat amb moderacion e equilibri; tot çò qu’es fach en excès pòt pas èsser san. Trenta minutas dins Internet pòdon èsser utials e beneficas, mas uèch oras de tira, o dobti fòrça.
L’interprèta Loto Perrella e lo Doctor Brian Weiss. Fòto: Natalia Campoy.
–Qu’es l’espiritualitat per vos?
–Per ieu, aquò significa una consciéncia superiora; una consciéncia e una coneissença superioras que constituïsson nòstra vertadièra natura. Teilhard de Chardin disiá que sèm pas d’èssers umans avent aicí una experiéncia espirituala, mas al contra d’èssers espirituals vivent una experiéncia umana. Esperit se referís a l’arma e a una consciéncia superiora. Es important de nos concentrar mai sus aquelas valors superioras, perque es per aquò que sèm aicí sus Tèrra. D’unes dison que venèm mai violents e que progressam pas espiritualament, e los mèdias balhan sovent l’impression que las causas son piègers de çò qu’o son realament, perque avèm sulcòp de novèlas de çò que se passa dins tota la planeta. Dins los tempses passats, nos seriam pas benlèu jamai mainat de çò que se passava dins de luòcs alunhats, o las informacions aurián mes de meses, quitament d’annadas, nos pervenir. Aquí perqué pensi que fasèm de progrèsses, e mai se la tecnologia balhe de còps l’impression del contrari. Cresi que i a fòrça personas espiritualas dins lo mond, de gents bonas. Mas un nombre pichon de personas malvolentas dispausant de tecnologias pòt causar fòrça tòrt.
–Dempuèi de tempses plan ancians, l’òme a daissat de traças d’espiritualitat dins totas las culturas. Perqué pensatz que, per exemple dins la religion crestiana, al sègle V après Jèsus-Crist, un concili aja suprimit de mots coma «reïncarnacion»?
–Pensi que i aguèt una rason especifica a aquò. Es una rason politica. Los govèrns, e en particular lo govèrn de la Glèisa, desiravan exercir un mai grand contraròtle sus las gents. Dins lo crestianisme, lo mot «reïncarnacion» s’aboliguèt perque se pensava que, sens la menaça del Jutjament Darrièr, i auriá pas cap de mejan de contrarotlar las gents. Jèsus cresiá en la reïncarnacion, es aquí tota l’ironia, l’ironia granda, perque existís mantuna referéncia a aqueste prepaus dins la Bíblia, e es curiós que, per de rasons politicas, las idèas de Jèsus dins aquel domeni sián estadas ignoradas e modificadas. I a totjorn agut de dificultats amb los politicians; es pas una novetat, quitament uèi.
–Aguèretz l’onor de conéisser e de trabalhar amb Elisabeth-Kübler-Ross, una persona engatjada dins l’acompanhament de la mòrt. Podètz ne dire qualques mots?
–Èra una amiga, sèm venguts amics, e parlava de fòrça d’aqueles subjèctes. Trabalhèt pas solament sus las fasas de la malautiá e de la mòrt; faguèt fòrça mai de trabalh. Foguèt la pionièra de las experiéncias de mòrt imminenta e venguèt una expèrta per analisar los dessenhs realizats pels mainatges e los adults a se morir. Cresiá tanben a la reïncarnacion e a las vidas passadas, e èrem d’acòrdi sus totas aquelas causas.
–Sabèm que trabalhatz actualament als Estats Units amb lo prestigiós parapsicològ James van Praagh. Quin tipe de trabalh realizatz?
–Es un medium que canaliza de messatges e ieu, coma psiquiatre, estúdii la consciéncia umana, en ensajant de comprene de quina faiçon se pòt canalizar de messatges e recebre d’informacions de personas que son pas jamai vistas. (Ièr, pendent lo talhièr qu’organizèrem, mantuna persona canalizèt, recebèt de messatges de lors pròches; una persona recebèt quitament de messatges d’una autra qu’aviá trabalhat amb ela, mas qu’aviá pas jamai conegut. De messatges plan detalhats, amb noms e luòcs, de personas defuntadas). Doncas, s’el pòt far aquela canalizacion, podèm totes la far. El, gràcias a son entrainament, la pòt far quand o desira, mentre que per la màger part d’entre nosautres, es quicòm d’aleatòri: aquò se pòt produire o non.
–Quand qualqu’un pòt canalizar o prene consciéncia d’una vida passada, que se passa ? Qué fa d’aquela informacion ? La planeta, ont n’es dins son trabalh collectiu?
–Aquò ajuda las personas. Per exemple, los que comunican amb lors pròches rendon compte que la mòrt existís pas, perque l’arma contunha d’existir e pòt comunicar amb de personas qu’an totjorn lor còs fisic. Aquò ajuda los que sofrisson d’abséncia d’aqueles èssers cars. A l’escala globala, aquò nos pòt ajudar a comprene que la Tèrra es nòstre ostal, e que ne devèm prene suènh, perque quand nos reïncarnam, tornarem aicí. Devèm mantenir nòstre ostal abitable. Podèm pas destruire l’aire, l’aiga e las condicions de vida, perque son pas solament nòstres mainatges e felens que i viuràn: nosautres meteisses vam tornar.
–De còps, de fenomèns fisics se produson, coma los cercles de cultura, los crop circles. Quina relacion percebètz-vos o que ne pensatz?
–Los ai vistes en Anglatèrra e ai parlat amb l’un dels agricultors, lo proprietari de las tèrras. Aquel agricultor es un òme plan simple e onèst. Es convencut que cap d’èsser uman auriá pas pogut crear aqueles cercles –e es un professional, un agricultor– a causa de la faiçon dont l’òrdi es plegat, mas sens que l’espiga siá pas trencada, e a causa del temps necessari. En Anglatèrra, l’estiu, la nuèch es plan corta, e aqueles cercles dins las culturas, que son plan complèxes, apareissián en plan pauc d’oras. E quand d’unas personas los an volgut imitar o los reproduire, n’an produch de còpias plan mediòcras e grossièras. I a pas cap de traça de ròdas de tractors, de maquinas o qué que siá. Sabèm pas çò que se passa amb aqueles cercles, mas çò que sabèm es que son pas faches per d’èssers umans, almens pas fisicament.
Lo Doctor Brian Weiss fulhetant un exemplar de la revista Athanor. Fòto: Natalia Campoy.
–Es una geometria sacrada perfiècha.
–Òc, exactament. E aquò se fa en plan pauc d’oras. I a pas cap de traça ni indici de tractors. Existís pas encara d’explicacion scientifica. La sola causa que sabi es que los èssers umans o pòdon pas far per ara. Es l’òbra d’una autra fòrça o energia. Es pas necessàriament extraterrèstre; aquò pòt èsser una energia mentala o una energia electromagnetica que comprenèm pas, o de comunicacions provenenta d’autras fonts. La sola causa que sabi es que lo fenomèn es pas provocat per d’èssers umans.
–Actualament, los èssers umans son dins de condicions optimalas per aver una compreneson mai nauta de lor mission sus la planeta. A l’encòp, existisson los mai grands desastres, las guèrras mai sagnosas, los atemptats mai grèus. Quina es vòstra percepcion a aqueste prepaus?
–La tecnologia progrèssa plan lèu-lèu. Los èssers umans son totjorn estats violents, i a totjorn agut de guèrras, mas ara las armas son fòrça mai eficaças. Las armas biologicas son fòrça mai perilhosas que las lanças. I a una mena de corsa entre lo desvolopament tecnologic e lo desvolopament espiritual. Espèri que las gents espiritualas ganharàn la corsa.
–Dins vòstre libre Muchas vidas, muchos maestros, dins un passatge, Katherin canaliza un mèstre e parla de la paur coma d’un gaspilhatge grand d’energia. De qué a realament paur l’èsser uman?
–Avèm de nombrosas paurs, avèm paur de la mòrt, de la vida, de la malescaduda, de la malautiá, de la pèrda, d’èsser pas aimats, d’èsser pas acceptats per la collectivitat. Avèm un festenal de paurs, es pas solament una paur, es la paur en general. Nos devèm ancorar fòrça mai dins l’amor e la compassion, perque l’amor e la compassion pòdon dissòlvre la paur.
–Avèm parlat del passat, del present. Quins projèctes avètz per l’avenidor?
–I a actualament cinc libres en castelhan. Lo quatren, Los mensajes de los sabios (Los messatges dels savis), es plan important per ieu. Lo cinquen mólzer del meteis subjècte, mas de faiçon mai artistica: parla de çò que cal far per la planeta –las causas dont avèm parlat e las que cal complir per la planeta–. I a fòrça pression de la part dels editors perque escriga mai, mas escriurai pas tant qu’aurai pas res a dire. Ara visiti de nombroses païses per parlar d’aqueles tèmas de l’amor, l’immortalitat, la compassion. Mon intuicion me ditz qu’es important, mas los resultats escapan a mon contraròtle. Çò que pòdi far, es ofrir e balhar. Los resultats dependon d’un nivèl superior. Aquel nivèl superior me farà saber quals son los projèctes per l’avenidor, quand lo moment serà vengut. Per ara, s’agís de partejar aquelas recèrcas amb lo mai grand nombre de personas possible. Soi segur que i aurà fòrça autres projèctes per l’avenidor, mas preferissi viure lo moment present. Se vivi corrèctament ara en m’ocupant del present, lo futur s’organizarà el meteis. Aquela es una autra paur: avèm paur de l’avenidor. Los messatges son fin finala los meteisses: coneissèm las responsas, sabèm çò que cal far, mas sèm una espècia plan obstinada. Far es fòrça mai dificil que saber.
–Doctor Weiss, mercé plan.
–Mercé plan a vosautres per l’oportunitat.
Traduccion: Jordi Ràfols.